(Видео) Трамп гласаше на Флорида пред изборите за Конгресот, анкетите им даваат предност на демократите за Претставничкиот дом

Американскиот претседател Доналд Трамп вчера гласаше на избирачко место во Флорида, заедно со првата дама Меланија Трамп, во пресрет на изборите за Конгресот закажани за 3 ноември.

Трамп гласаше лично во Вест Палм Бич, во близина на неговиот имот Мар-а-Лаго, каде што го поминува викендот. По гласањето, на оделото стави налепница со натпис „Гласав“.

Неговото гласање привлече внимание и поради претходните критики на сметка на гласањето по пошта. Критичарите посочуваат дека Трамп и самиот претходно го користел овој начин на гласање, иако се залага за построги правила и ограничувања.

Демократите се надеваат на мнозинство во Претставничкиот дом

Во пресрет на изборите, Трамп се залагаше за построги правила за гласањето по пошта, тврдејќи дека таквите промени би помогнале во спречувањето изборни измами. Неговите критичари, пак, го обвинуваат дека со предложените мерки се обидува да ја ослабне поддршката за опозициските демократи, чии гласачи традиционално почесто го користат гласањето по пошта.

Изборите ќе одредат која партија ќе има контрола врз Конгресот во последните две години од претседателскиот мандат на Трамп. Републиканците се надеваат дека ќе го задржат тесното мнозинство во двата дома на Конгресот.

Анкетите покажуваат дека демократите имаат добри изгледи да ја преземат контролата врз Претставничкиот дом. Промената на мнозинството во Сенатот се смета за потешка, бидејќи на овие избори се избираат околу една третина од сенаторските места, иако и таму останува можноста за промена на односот на силите.