Вучиќ за милијардите запленети во Унгарија: „Немојте да лажете, тоа се четири-пет милиони евра или така нешто“
Српскиот претседател Александар Вучиќ се обиде да ја намали тежината на случајот со милијардите запленети во Унгарија, посочувајќи дека станува збор за форинти, а не за евра, и обвинувајќи ги медиумите дека со известувањето ја доведуваат јавноста во заблуда.
Коментарите на Вучиќ доаѓаат по големата акција на унгарските власти, во која беа запленети повеќе од пет милијарди форинти, 2,6 милиони евра и 1,2 милиони долари. Парите биле пронајдени на повеќе локации низ земјата, меѓу кои шуми и напуштени земјоделски објекти, во рамките на истрагата за случајот поврзан со Миклош Шештак, поранешен министер и соработник на Виктор Орбан.
„Немојте да лажете. Пронашле милијарди, но во форинти. Значи, само сакам да ви кажам дека парите биле скриени низ цела Унгарија, не знам, четири-пет милиони евра или така нешто, а вам ви пишуваат милијарди“, рече Вучиќ.
Иако е точно дека милијардите се изразени во форинти, а не во евра, изјавата на Вучиќ го остава настрана фактот дека покрај нив биле запленети и милиони евра и долари. Вкупната заплена, според објавените податоци, опфаќа значителни суми во три различни валути, а не само форинти.
Вучиќ потоа направи паралела со случајот со Поштенска штедилница, тврдејќи дека една милијарда форинти не е голема сума за таа институција и дека станува збор за околу девет милиони евра за исплата на пензии.
Но, српскиот претседател не застана тука. Повторно ја отвори и темата за Алта банка, обвинувајќи дека претходните информации за наводно извлекување 450 милиони евра со камион биле лага.
„Како што лажеа за Алта банка дека некој влечел во камион 450 милиони евра и така натаму, а потоа се покажа дека сето тоа е лага“, рече Вучиќ.
Тој предупреди дека ваквите информации создаваат лоша атмосфера во општеството и дека граѓаните сè потешко ќе можат да разликуваат вистина од лага.
„На лагата нозете се кратки, но се создава лоша клима, лоша атмосфера, па потоа веќе не можете да разликувате што е вистина, а што лага. Добро е додека луѓето се загрижени, нема да биде добро во февруари и март кога луѓето ќе станат бесни“, заклучи Вучиќ.
