Финскиот претседател Александар Стаб изјави дека Европа мора да биде подготвена за продолжување на хибридните и диверзантски напади на Русија, но дека не треба да „претерува“, бидејќи Москва, како што оцени, се обидува да ги дестабилизира и заплаши европските земји.
Во интервју за „Политико“ на маргините на Генералното собрание на Обединетите нации во Њујорк, Стаб рече дека Финска гледа руска активност во своите разузнавачки податоци, но дека „во моментов не гледа непосредна воена закана“.
Тој изјави дека Русија нема ниту интерес ниту капацитет да започне сеопфатна воена ескалација и ги повика европските сојузници да останат „ладни, смирени и прибрани“ во сегашната ситуација.
Зборувајќи за неодамнешната одлука на Германија да ја припише одговорноста за обидот за напад со беспилотни летала во Лајпциг на Русија, Стаб рече дека е важно да се посочи одговорноста и последиците од ваквите потези.
Во исто време, тој изрази несогласување со проценките на одредени разузнавачки служби, кои предупредуваат дека Русија наскоро би можела да нападне една од европските земји.
„Не гледаме докази за тоа“, рече Стаб, додавајќи дека Европа мора да биде „будна и претпазлива“.
Финскиот претседател изрази претпазлив оптимизам пред средбата меѓу американскиот претседател Доналд Трамп и украинскиот претседател Володимир Зеленски во Њујорк.
Според него, не може да се очекува мировен договор оваа недела, но договор за рамка за примирје во Црното Море, поврзан со извозот на жито или енергија, би претставувал чекор во вистинската насока.
Стаб изјави дека се надева дека ќе ги продолжи мировните преговори во наредните недели, вклучително и можноста за средба меѓу рускиот претседател Владимир Путин и Зеленски на самитот на Г20 во Мајами во декември.
„Дали претседателот Трамп ќе успее да ги донесе Зеленски и Путин на иста маса? Тоа е можност и би бил џекпот“, рече Стаб, додавајќи дека преговорите во моментов се уште далеку од таа фаза.
Тој ги отфрли шпекулациите дека би можел да биде главен европски преговарач во идните разговори со Русија, наведувајќи дека Европа веројатно нема да има ниту еден претставник. Тој ја опиша својата улога како помагање „одзади“.
Фото: ЕПА
