Крипто-берзата Bitget, со седиште во Сингапур, објави дека претрпела сериозен безбедносен пробив што резултирал со кражба на околу 351 милион долари во различни дигитални средства.
Инцидентот се случил кон крајот на септември и моментално претставува најголема кражба на криптовалути во 2026 година. Bitget се сомнева дека зад нападот стојат хакери поврзани со Северна Кореја.
Откако открила неовластени трансакции, Bitget привремено ги суспендирала исплатите. Извршната директорка Грејси Чен изјави дека средствата на корисниците се безбедни и дека загубата ќе биде покриена од фондот за заштита на компанијата, кој моментално располага со над 464 милиони долари, пренесува Bug.
Според неа, напаѓачите не ги компромитирале директно приватните клучеви на корисниците, туку пробиле критичен позадински систем во рамките на инфраструктурата на hot wallets. Ова им овозможило да манипулираат со податоците за трансакциите и да одобрат масовен трансфер на средства.
Bitget соработува со безбедносните фирми Mandiant и SlowMist во истрагата, додека on-chain аналитичари ги следат украдените средства. Наводно, напаѓачите голем дел од украдените средства ги замениле за Ether. Сè уште не е познато кога повторно ќе бидат овозможени исплатите за корисниците.
Bitget смета дека методот користен во нападот се совпаѓа со обрасци забележани во претходни напади поврзани со севернокорејски хакерски групи, вклучително и групата Lazarus. Средствата украдени од крипто-секторот често се поврзуваат со финансирањето на програмата за оружје на Северна Кореја и со заобиколувањето на меѓународните санкции.
Според аналитичарите, Северна Кореја е поврзана со речиси три четвртини од сите кражби на криптовалути оваа година. Хакерските групи користат методи како што се социјален инженеринг и таргетирани напади врз вработени во крипто-компании.
