(Фото) Шест недели по породувањето, таа се појави на ревијата на „Victoria’s Secret“: „Ми сошија влошки во градниците“

Само шест недели по породувањето, Барбара Палвин прошета на пистата на модната ревија на „Victoria’s Secret“, што предизвика лавина коментари.

Манекенката Барбара Палвин (33), која во септември ја доби ќерката Силви, се најде во центарот на вниманието откако се врати на пистата на „Victoria’s Secret“ само шест недели по породувањето.

Нејзиното враќање на работа – кое се случи за време на модната ревија во Лос Анџелес на 18 октомври – привлече големо внимание. Во неодамнешното интервју за „E!“, Палвин откри дека реакциите на јавноста за нејзината одлука биле поделени.

„Некои луѓе беа воодушевени што се вратив, додека други сметаа дека веројатно би требало да одмарам дома“, изјави манекенката на забавата за Ноќта на вештерките, која ја организираше заедно со нејзиниот сопруг, Дилан Спраус, на 31 октомври.

„Секое искуство по породувањето е различно, а ова е моето“, додаде таа.

Таа објасни дека нејзиното враќање на пистата немало да биде возможно без поддршката од нејзините најблиски.

„Имам среќа што ја имам поддршката од мојот сопруг и семејството. Тие овозможија да се вратам“, сподели Палвин.

По ревијата, Барбара објави лична порака на социјалните мрежи во врска со нејзината одлука повторно да биде дел од тимот на „Victoria’s Secret“ оваа година.

„Голема благодарност до ’Victoria’s Secret‘ што ме прифатија точно таква каква што сум во овој период по породувањето и што направија да се чувствувам убаво и самоуверено“, напиша таа, придружувајќи ја објавата со серија фотографии – меѓу кои и една на која е нејзината ќеркичка. Малото девојче носеше боди со златни ангелски крилја.

Манекенката отворено зборуваше за подготовките зад сцената, откривајќи детаљ кој покажува колку реалноста се разликува од гламурот што публиката го гледа на пистата.

„Зад сцената, буквално ми зашиваа влошки за доење во градниците! Мал потсетник за реалноста што се крие зад целиот тој гламур“, напиша таа.

Меѓу фотографиите, сподели и една на која се гледа како измолзува млеко пред да се пресоблече во својата комбинација за пистата.

„Враќањето на работа беше мој избор и имав среќа што можев да го направам тој избор. Иако сум неизмерно благодарна за оваа можност, не можам а да не помислам на сите мајки кои ја немаат таа опција. Во САД, од многу жени се очекува да се вратат на работа само шест до осум недели по породувањето – честопати без платено породилно отсуство. На мајките им треба повеќе време, поголема поддршка и повеќе можности“, изјави манекенката.

„Многу сум горда на овој момент и на она што го постигнав, и среќна сум што сега сум повторно во нашиот мал свет со Силви“, додаде таа.

Сепак, изразувајќи благодарност до сите што ѝ дадоа поддршка, Барбара упати важна порака до другите мајки: „Секое искуство по породувањето е различно и никоја од нас не треба да чувствува потреба да се споредува со другите“. „Она што го видовте на модната писта бев јас во полн сјај, но моето секојдневие по породувањето изгледа сосема поинаку. Некои денови, самото наоѓање време за туширање или за оброк во мир е голем успех. И тоа заслужува да се прослави“, истакна Барбара.

На крајот, таа нагласи дека не е важно дали жената се враќа на модната писта, на работа или едноставно се обидува да издржи уште една ноќ без сон.

„Сите ние споделуваме нешто неверојатно: создадовме чудо. И само тоа е доволна причина за славење.“