Како да го „натерате“ божиќниот кактус да процвета до празниците?

Со соодветни услови и правилна нега, можете да го поттикнете вашиот божиќен кактус да процвета.

Божиќниот кактус Schlumbergera е собно растение кое не бара многу грижа, а дава прекрасни цветови.

Во своето природно живеалиште, божиќните кактуси цветаат по сезоната на дождови; сепак, со промена на нивната средина, можеме да ги „измамиме“ да процветаат порано.

Со прилагодување на температурата и ограничување на количината на светлина што ја добива вашиот божиќен кактус, можете да го поттикнете да процвета токму навреме за празниците.

Соодветно осветлување
„Должината на денот е главниот поттик за цветање“, вели д-р Брус Дан, професор по хортикултура на Државниот универзитет во Оклахома. Тој додава дека ниските температури (под 21°C), намаленото наводнување и доволното количество индиректна светлина го поттикнуваат цветањето – но, што е најважно, на растенијата им се потребни услови на „краток ден“ за да процветаат.

Идеалните услови за формирање на цветни пупки вклучуваат светла дневна светлина проследена со 13 или повеќе часа непрекината темнина. Овој втор фактор е клучен; доколку периодот на непрекината темнина се прекине – макар и накратко – растенијата може воопшто да не процветаат.

„Во комерцијалното одгледување, цветањето обично се контролира преку регулирање на светлината со помош на технологија за целосно затемнување“, објаснува д-р Дан. Во домашни услови, сепак, контролата на светлината е технички многу поедноставна. Потребната темнина можете да ја обезбедите така што навечер ќе ги покриете растенијата со црна ткаенина или со кутија. Друга опција е да ги чувате растенијата во просторија што не се користи, во подрум, плакар или загреана гаража каде што може да се контролира осветлувањето – на пример, со поставување на растенијата под специјални светилки за одгледување. Обезбедете темнина во текот на ноќта во период од шест недели, почнувајќи од моментот кога ќе почнат да се развиваат цветните пупки.

Откако ќе се појават цветните пупки, растенијата може да се вратат во просторот за живеење каде што ќе бидат изложени.

„Чувајте ги растенијата подалеку од директна сончева светлина, бидејќи таа може да ги ’изгори‘ листовите“, вели д-р Дан. Идеалните услови за изложување вклучуваат 4 до 8 часа индиректна светлина.

Одржувајте ниски температури
Божиќните кактуси најдобро цветаат при ниски температури. Одржувајте ја температурата на воздухот помеѓу 15°C и 20°C за време на развојот на пупките и обидете се да одржите слични услови и во просторот каде што ќе бидат изложени растенијата. Овие растенија се чувствителни на вознемирување и може да ги отфрлат пупките како реакција на ненадејни промени во температурата.

„Најдобро е сите собни растенија, вклучително и божиќните кактуси, да се чуваат подалеку од провев (без разлика дали е топол или ладен)“, вели д-р Ден. Преместете ги растенијата на местото каде што ќе стојат штом ќе се појават пупките, за да го намалите ризикот од нивно опаѓање.

Ѓубрење за време на сезоната на растење
Иако е важно да се ограничи употребата на ѓубриво за време на формирањето на пупките и цветањето, редовното прихранување во текот на сезоната на растење поттикнува поздрав раст и подобро цветање наесен. Започнете со ѓубрење напролет, кога ќе продолжи активниот раст, користејќи избалансирано ѓубриво (со сооднос 10-10-10) разредено на половина од препорачаната јачина. Прихранувајте ги растенијата еднаш месечно во текот на сезоната на растење, сè до август.

Како што се приближува есента, треба да ја насочите енергијата на растението кон цветање, наместо кон вегетативен раст. За да го постигнете ова, ограничете го внесот на азот. Некои одгледувачи претпочитаат да користат ѓубриво без азот, наменето за поттикнување на цветањето (на пример, со сооднос 0-15-10), за да го стимулираат развојот на пупките; сепак, можете и целосно да престанете со ѓубрењето.

Не претерувајте со наводнувањето
Иако божиќните кактуси потекнуваат од дождовните шуми, ним не им е потребна претерано влажна почва. Всушност, божиќните кактуси се подложни на гниење на коренот, па затоа е важно да се избегнува прекумерно наводнување. За време на сезоната на растење, наводнувајте ги растенијата кога горниот слој на почвата ќе биде сув на допир.

Намалете го наводнувањето на почетокот на есента, додека ги подготвувате растенијата за цветање. Запомнете, во нивното природно живеалиште, божиќните кактуси цветаат по дождливата сезона. Предизвикувањето благ стрес поради недостаток на вода, преку намалување на наводнувањето, може да помогне да се поттикне формирањето на пупки.

Растенијата се почувствителни на промени во нивото на влага додека се развиваат пупките и цветовите. За развој на цветовите им е потребна постојана влажност; сепак, ако добијат премногу вода, може да ги отфрлат пупките. Еден начин да се одржи оптимална влажност на почвата откако ќе се појават пупките е да ја давате истата вкупна количина вода секоја недела, но поделена на две одделни наводнувања.

Тајмингот е важен.
На растенијата им се потребни околу осум недели, од почетокот на периодот со ограничена светлина, за целосно да процветаат. За да се осигурате дека растенијата ќе процветаат тогаш кога сакате, одредете го посакуваниот датум на цветање и одбројте осум недели наназад.

За оптимален развој на цветните пупки, обезбедете им темнина во текот на ноќта во период од шест недели. Во идеални услови, периодот на цветање може да трае од пет до осум недели.

Иако божиќните кактуси најчесто цветаат за време на празниците, може да се поттикнат да цветаат во кое било време од годината.

„Дури и за време на долгите летни денови, ако се обезбеди период на темнина – целосно отсуство на светлина – во интервалот од 17:00 до 08:00 часот, растенијата можат да процветаат“, вели д-р Ден.

Можете дури и да постигнете растенијата да цветаат повеќе пати во текот на годината. За да го поттикнете повторното цветање, вратете ги растенијата во услови на краток ден.

Кроење
И конечно, кроењето во текот на летните месеци може да придонесе за пообилно цветање во зима. Искроете ги растенијата на почетокот на јуни; тие ќе реагираат со посилно разгранување, што резултира со поголем број врвови на ластарите способни да развијат цветни пупки. Исечените делови потоа можете да ги искористите за размножување нови растенија.