Мицкоски во Брисел: Нашата определба за членство во ЕУ е јасна и недвосмислена, Македонија заслужува европска иднина

Премиерот Христијан Мицкоски извести дека денеска во Брисел се сретнал со Герт Јан Копман, генерален директор на Генералниот директорат за проширување и источно соседство при Европската комисија.
Како што информираше премиерот, во фокусот на разговорите биле европската перспектива на Македонија, напредокот во реформските процеси и следните чекори во пристапувањето кон Европската Унија.
„Нашата определба за членство во Европската Унија е јасна и недвосмислена. Македонија заслужува европска иднина, заснована на принципиелни односи, почитување и заштита на националните интереси, како и доследно спроведување на реформите во интерес на граѓаните.
Продолжуваме со посветена работа, исполнување на реформската агенда, одговорна политика и јасна визија за европска, стабилна и просперитетна Македонија“, порача Мицкоски.


