Завршија преговорите меѓу Русија и Украина: „Постигнат е напредок“
Руските и украинските преговарачи соопштија дека е постигнат одреден напредок на дводневните мировни преговори во Абу Даби, кои завршија денеска. Сепак, американските посредници оценија дека меѓу завојуваните страни постои недостиг од доверба, како и разлики во ставовите за прашања како што се териториите.
На првите мировни преговори по осум месеци, Русија и Украина се договорија за поголема размена на заробеници, но по состаноците со посредство на Соединетите Американски Држави немаше други позначајни конкретни резултати.
Американскиот претставник Џаред Кушнер, зет на претседателот Доналд Трамп, изјави дека посредниците се обидуваат да ги усогласат интересите на двете страни за да се стави крај на конфликтот. Тој изрази уверување дека е можно да се најде пат до мирот.
И покрај јавниот оптимизам на Трамп, нема знаци дека е постигнат компромис за клучните прашања.
Додека преговорите за териториите се во застој, при што Украина ги отфрли барањата на рускиот претседател Владимир Путин да го предаде целиот источен регион Донбас во замена за мир, американските посредници се обидоа да ги насочат разговорите кон повоените безбедносни гаранции и обновата.
„Во моментов практично нема доверба меѓу страните, што е и очекувано по конфликт како овој“, изјави Кушнер, додавајќи дека на преговорите во главниот град на Обединетите Арапски Емирати биле разгледани и територијалните прашања, кои ќе бидат најтешки за решавање.
„Во некои области гледаме простор за компромис, додека за други се потребни дополнителни разговори, но верувам дека ова беше многу добар чекор“, додаде тој.
Кушнер изјави дека тој и неговиот колега Стив Виткоф в четврток ќе отпатуваат во Москва на средба со Путин, на која ќе го отворат прашањето за проширување на преговорите со европските партнери, за кои рече дека мора да бидат вклучени во разговорите.
Тој додаде дека европската безбедносна архитектура би можела да претставува основа за договор, но не наведе детали.
Додека администрацијата на Трамп ја намали директната поддршка за Украина, Европа стана нејзин главен извор на финансиска и воена помош.
По средбата во Москва, Кушнер и Виткоф ќе се сретнат со украинскиот претседател Володимир Зеленски за време на посетата на Ирска.
Двете страни меѓусебно се обвинија за напади во текот на ноќта, и покрај мировните преговори што беа во тек.
