(Видео) Николовски: Во ЕУ го запреа Мацура за 19 отсто, кај нас доби согласност за 100, Европа е филтер за криминал
Пратеникот на СДСМ, Љупчо Николовски, на надзорната расправа за Алта банка во Собранието побара конкретни одговори од Народната банка за проверките направени пред да се одобри преземањето на Стопанска банка Битола.
Тој посочи дека европските регулатори го запреле обидот на Давор Мацура за стекнување удел од 19 проценти во австриската Адико банка, додека во Македонија добил согласност за целосно преземање на банка.
„Европските стандарди и правила не се формалност. Тие се филтер. Филтер за тоа кој смее да поседува банка, каков углед има, каква репутација има, од каде му се парите, дали носи ризик од перење на пари. Во Австрија тој филтер проработи, кај нас не проработи“, нагласи Николовски.
Тој праша како предупредувањата и одлуките на европските институции не довеле до соодветна реакција во Македонија, иако информациите биле јавно достапни.
„Зарем една година за никој од Народната банка, од голема институција, битна, овие информации не беа достапни? Европа ја затвори вратата во Виена, ние му ја отворивме во Битола. А предупредувањата не беа само европски, ги имаше во сите регионални медиуми. СДСМ 11 месеци зборува на оваа тема“, рече Николовски.
Случајот со Алта банка покажува зошто европската интеграција е суштинска за заштитата на граѓаните и финансискиот систем. Тој истакна дека членството подразбира надзор, размена на информации и проверки на потеклото на капиталот и репутацијата на сопствениците.
„Да бевме дел од Европската Унија, со европски надзор, со Европска агенција против перење на пари и со задолжителна размена на информации помеѓу супервизорите, ова немаше да се случи“, порача Николовски.
Поздравувајќи го влегувањето во СЕПА, европската платежна зона, Николовски нагласи дека користењето на европските платежни механизми мора да биде придружено со примена на европските стандарди за контрола.
„Не можеме да ги користиме европските начини и шеми на плаќање, а да ги прескокнуваме европските правила и проверки за тоа кој може да поседува банка“, истакна тој.
Николовски побара одговор дали Народната банка ги разгледала одлуката на Европската централна банка и казната од австрискиот регулатор пред да даде согласност за преземањето. Дополнително, повикувајќи се на јавно објавените информации од српското обвинителство, праша дали институцијата имала сознанија за извлекувањето пари од банката.
„Дали Народната банка ги имаше пред себе одлуката на Европската централна банка и казната од Австрија пред да даде согласност?“, праша Николовски, барајќи одговор и дали Народната банка знаела „за влечењето на 390 милиони евра наназад во еден подолг период“.
Во обраќањето тој нагласи дека заштитата на средствата на клиентите е минимумот што го очекува јавноста, но дека последиците по довербата во институциите веќе се присутни.
„Битола и Пелагонија не заслужуваат уште една банкарска рана. Очекувам дека банката ќе се продаде и без ниту еден денар штета на ниту еден клиент и тоа е минимумот којшто го очекува целата јавност“, порача Николовски.
