(Видео) Објавена снимка од повикувачки центар на СНС, луѓето ги кријат лицата, некои и плачат

🔴Најновите вести за изборите во Србија следете ги ОВДЕ.

На Инстаграм-профилот „Збор Батајница“ е објавена снимка за која се тврди дека прикажува повикувачки центар на Српската напредна партија (СНС), во кој се собираат таканаречени сигурни гласови, објави „Нова.рс“.

На видеото се гледаат лица кои работат во просторијата, а кои се вртат од камерата и се обидуваат да ги сокријат лицата. Некои од нив плачат, додека на луѓето што ги снимаат им довикуваат да се оддалечат. На масите се забележуваат списоци со имиња на граѓани, а на вратата од просторијата има реклами за компанијата „КарГо“.

Случајот потсетува на наводите за повикувачки центри на СНС пред изборите во декември 2023 година, кога Центарот за истражувачко новинарство на Србија (ЦИНС) објави информации за нивното функционирање и укажа на можни злоупотреби на лични податоци и купување гласови.

Тогаш опозициските кандидатки за пратенички Јелена Јериниќ и Ѓорѓе Павичевиќ поднесоа кривична пријава против лица за кои постоело сомневање дека се одговорни за случајот. Според ЦИНС, три години подоцна сè уште нема напредок во постапката.