Милановиќ го осуди величењето на нацизмот во Сплит: Ова е срамно и недозволиво, потребни се санкции

Хрватскиот претседател Зоран Милановиќ го осуди однесувањето на дел од навивачите на Торцида, кои вчера во Сплит, пред фудбалскиот натпревар меѓу Хајдук и Ајакс во Конференциската лига, извикуваа пароли со кои ги величеа нацистичкиот и усташкиот режим.

„Недозволиво, срамно и за секоја осуда е однесувањето на дел од навивачите на Торцида во Сплит. Извиците и постапките со кои отворено се слават нацистичкиот и усташкиот режим бараат итна и систематска реакција од хрватската полиција, државното обвинителство и, на крајот, судовите. Ги повикувам сите надлежни институции крајно сериозно да пристапат кон истрагата за овој срамен настан, за такво нешто повеќе да не се повтори“, порача Милановиќ.

Тој нагласи дека осудите од Владата повеќе не се доволни и побара конкретни мерки и санкции.

„Зборовите на осуда што ги слушаме од Владата повеќе не се доволни. Потребни се мерки и санкции што ќе покажат дека во Хрватска нема место за величење на нацизмот и усташтвото“, истакна хрватскиот претседател.

Милановиќ порача и дека навивачите кои го сакаат и почитуваат својот фудбалски клуб не смеат да бидат заложници на малцинство кое, според него, не ги срами само Торцида и Хајдук, туку и цела Хрватска.