Повеќе од 100 уапсени на протестите во Париз, меѓу нив и 40 малолетници
Повеќе од 100 лица биле уапсени на протестите во Париз во саботата, меѓу кои и 40 малолетници, соопшти париската полиција. Демонстрациите, на кои граѓаните протестираа поради високите трошоци за живот, главно поминале мирно.
Според соопштението на полициската префектура, биле уапсени вкупно 126 лица, од кои 40 малолетници. Во полициски притвор биле задржани 108 лица, меѓу нив и 38 малолетници.
Париското обвинителство соопшти дека приведувањата главно биле извршени меѓу групи за кои било проценето дека имале намера да предизвикаат насилство или да организираат собири.
На протестната прошетка меѓу плоштадите Република и Нација во Париз учествувале околу 24.000 луѓе. Поголемиот дел од демонстрантите мирно се разотишле околу 18 часот, но подоцна полицијата открила две непријавени протестни рути, кои биле брзо пресретнати.
Според податоците на француското Министерство за внатрешни работи, на протестите низ целата земја учествувале околу 106.000 луѓе, а биле уапсени вкупно 219 лица.
