Републиканец ја предупредува Турција: Не сте добар сојузник кога окупирате туѓа територија

Американскиот сенатор Рик Скот ја обвини Турција за „насилничко однесување“ кон Грција и Кипар, упатувајќи невообичаено остри критики кон сојузник во НАТО за време на неговата посета на двете земји.

Сенаторот од Флорида изјави за „Асошиејтед прес“ дека Турција „не се однесува како сојузник во НАТО“, наведувајќи ги споровите со Грција околу воздушниот простор и поморските граници, како и континуираното воено присуство на Турција во северниот дел на Кипар – остров кој е поделен уште од 1974 година.

Тој оствари разговори со грчки претставници.

Коментарите на Скот доаѓаат во време на обновени тензии околу планираниот подводен кабел за електрична енергија, кој треба да ги поврзе Грција и Кипар, со можност за проширување и до Израел. Турција тврди дека мора да биде консултирана пред да започнат какви било истражувања на морското дно.

Скот, кој е член на сенатските комисии за вооружени сили и за надворешни односи, разговараше за прашања поврзани со одбраната и енергетиката со грчките претставници, по посетата на Атина минатата недела од страна на американскиот државен секретар Марко Рубио.

„Не се однесувате како сојузник во НАТО кога испраќате авиони Ф-16 да летаат над територијата на друга земја. Исто така, не сте добар сојузник кога окупирате дел од територијата на друга земја – а токму тоа го правите. Се надевам дека тоа ќе се промени, но гледајќи ја ситуацијата, станува збор за насилничко однесување“, рече Скот, мислејќи на Турција.

Грција и Турција, двете членки на НАТО, со децении се во спор околу поморските граници во Егејското Море и источниот Медитеран, како и околу поделениот остров Кипар. Проектот за поврзување на електричната мрежа стана најновиот извор на тензии меѓу Анкара и Атина.

„Мислам дека она што го прават Грција, Кипар и Израел ќе биде добро. Тоа е добро за нив, а добро е и за нас. Ќе направиме сè што можеме за да помогнеме. Ќе направиме сè што е во наша моќ за да се осигураме дека Турција нема да создава проблеми за тој проект“, најави Скот.

Скот исто така напомена дека неодамнешното заминување на Кимберли Гилфојл од функцијата амбасадор на САД во Грција нема да влијае на односите меѓу САД и Грција. Белата куќа јавно побара нејзина оставка, во услови на обвинувања за несоодветно и, можно е, незаконско однесување, што таа го негира.