Трамп го сакаше шефот на UFC за портпарол на Белата куќа, тој го одби
Претседателот на САД, Доналд Трамп, му ја понудил функцијата секретар за односи со јавноста на Белата куќа на шефот на UFC, Дејна Вајт, но тој ја одбил оваа необична понуда, според извор запознаен со ситуацијата, како што пренесува „Ројтерс“.
Вчера, Трамп објави дека побарал од промоторот на мешани боречки вештини да ја преземе оваа клучна комуникациска улога.
„Задоволство ми е да објавам дека на големиот Дејна Вајт, жесток борец и воин, му е понудена позицијата секретар за односи со јавноста на Соединетите Американски Држави“, напиша Трамп на својата платформа за социјални медиуми, Truth Social. Тој го покани да донесе шестмина сегашни и поранешни шампиони на UFC како „помошници“, приложувајќи и нивни фотографии.
Меѓу нив се двајца борци од рускиот регион Дагестан, Ислам Махачев и Хабиб Нурмагомедов; Американците Џастин Гејџи, Даниел Кормје и „Кајла Харис“ (веројатно се мисли на Кајла Харисон); како и Бразилката Аманда Нуњес, која минатата година доби американско државјанство.
„Ни требаат овие луѓе за да нè бранат од радикалната левица“, напиша Трамп, завршувајќи ја објавата со апел: „Дејна, те молам, прифати ја работата!“
Иако еден од соработниците на Трамп подоцна изјави дека претседателот само се шегувал, неговата објава доаѓа во момент кога Белата куќа навистина бара нов портпарол. Дејна Вајт, прашан за понудата на прес-конференција во Лондон по еден боксерски меч, избегна директен одговор, велејќи само дека во понеделник ќе се сретне со Трамп.
Потрагата по личност за оваа клучна позиција, за која Трамп лично е заинтересиран, стана уште поважна откако демократите ја презедоа контролата врз Конгресот и најавија истраги за неговата администрација.
Функцијата портпарол е испразнета откако Кејти Закарија беше отпуштена минатиот месец, по само пет дена на работа – најкраткиот мандат во историјата. Закарија ја замени Каролин Ливит, која ја напушти функцијата кон крајот на август, по една и пол година, за да поминува повеќе време со своето семејство. Овој месец таа му се придружи на „Фокс њуз“ (Fox News) како соработник, пишува Си-Ен-Ен (CNN).
