Трамп, Путин и Си Џинпинг следната недела на историска трилатерална средба во Кина – ќе разговараат за нуклеарното оружје

Трамп, Путин и Си Џинпинг планираат историска трилатерална средба следната недела во Кина, на маргините на самитот на Азиско-пацифичката економска соработка (АПЕК), соопшти Белата куќа.

Средбата на лидерите на САД, Русија и Кина ќе се одржи во јужниот кинески град Шенжен, за време на учеството на американскиот претседател Доналд Трамп на самитот, изјави портпаролката на Белата куќа, Оливија Велс.

Ќе разговараат за намалување на нуклеарното оружје

Според Велс, една од темите на разговорите ќе биде намалувањето на нуклеарното оружје во светот, чие ширење Трамп го смета за особено опасно.

На средбата на трите најголеми нуклеарни сили би можело да стане збор и за Иран, но не и за војната во Украина, пренесуваат американските медиуми.

Сепак, не се очекува разговорите да резултираат со конкретен договор, изјавил неименуван висок американски функционер за агенциите АП и Ројтерс.

Трамп ќе има и одделна средба со Си

Трамп во Шенжен треба да пристигне доцна во среда, каде што ќе учествува на дводневниот самит на 21 земја членка. Во четврток се планирани и билатерални разговори со кинескиот претседател Си Џинпинг.

Тоа ќе биде нивна четврта средба откако Трамп се врати на функцијата во 2025 година.

„Претседателот Трамп ќе ја заврши посетата на Кина со трилатерална средба со претседателите на Соединетите Американски Држави, Народна Република Кина и Руската Федерација“, изјави Велс.

Посетата на Трамп ќе започне во вторник со учество на самитот на Асоцијацијата на нациите од Југоисточна Азија (АСЕАН) на Филипините. Од Белата куќа велат дека патувањето треба да донесе резултати за американскиот народ и да ги унапреди интересите на САД во Индо-пацифичкиот регион.

Истече договорот за контрола на нуклеарното оружје

Средбата се одржува во период кога САД и Русија останаа без клучниот договор за контрола на нуклеарното оружје, кој истече во февруари. Со тоа двете земји ги загубија важните механизми за надзор над своите нуклеарни арсенали, а заврши и долгогодишната рамка на соработка во контролата на вооружувањето.

Обединетите нации ги повикаа Вашингтон и Москва без одложување да договорат нова рамка за контрола на оружјето.

Трамп претходно изјави дека истечениот договор би можел да биде заменет со подобар, во кој би била вклучена и Кина, која во меѓувреме го зголемува својот нуклеарен арсенал.