(Видео) Новата власт во Србија најавува крај на трговијата со оружје со Израел; Вучиќ е бесен
Филип Убовиќ, претставник на „Студентската листа“ во Србија, изјави дека платформата на движењето вклучува прекин на трговијата со оружје со Израел. Зборувајќи за можните политики на новата власт, тој додаде дека проектот за фабрика за беспилотни летала – поврзан со соработката меѓу Србија и израелската компанија Elbit Systems – мора да биде запрен.
„Она што се случува таму е дамка за човештвото; тоа е навистина трагично. Во нашата платформа експлицитно стои дека ќе ставиме крај на трговијата со оружје со Израел“, рече Убовиќ за време на гостувањето во Novara Live, емисија на британскиот медиум Novara Media.
Тој додаде дека неговото движење ја осудува инвазијата на туѓи територии, конкретно израелската инвазија на Палестина.
Убовиќ истакна дека Александар Вучиќ одржува блиски врски со Израел, посочувајќи на отворањето фабрика за беспилотни летала. Тој го опиша проектот како „скандалозен“ и инсистираше на тоа дека тој мора да биде запрен.
Вучиќ: Тие сакаат да го уништат одбранбениот сектор на Србија
Во видео објавено на Инстаграм, Вучиќ го обвини студентското движење дека има за цел да го уништи одбранбениот и безбедносниот сектор на Србија, тврдејќи дека тоа се прави „по налог на странски разузнавачки служби“.
Тој спомена дека студентите предлагаат укинување на задолжителниот воен рок од 75 дена, додавајќи: „Од еден од нив дознавме дека имаат намера да ја прекинат соработката со Израел, Кина и други земји кои ги поседуваат најмоќните војски и оружје во светот“. „На што ви личи ова? На кого ја предаваме државата? И од кого – и како – ќе можеме да се заштитиме и одбраниме? Дали ова ве потсетува на она што го гледавме помеѓу 2000 и 2012 година?“, рече тој.
Брнабиќ: Повеќе од 20.000 работници би можеле да ги загубат своите работни места
Ана Брнабиќ изјави дека над 20.000 работници во одбранбената индустрија би можеле да останат без работа.
На 17 септември, Вучиќ свечено отвори погон за склопување беспилотни летала во белградската населба Макиш, проект поврзан со соработката меѓу Србија и израелската компанија „Елбит системс“. Составувањето се одржува во просториите на компанијата „SDS Technologies“.
БИРН објави дека регистриран сопственик на „SDS“ е компанијата „CUPA Limited“ со седиште во Лондон, како и дека моменталната сопственичка структура не соодветствува со претходните најави за поделба на сопственоста помеѓу „Elbit“ и „Yugoimport“.
БИРН објави дека извозот на српско оружје и муниција во Израел достигнал 114 милиони евра, при што проекциите опфаќаат период до крајот на 2025 година.
