Microsoft: Проблемите се решени, сè функционира како што треба
Microsoft објави дека неговите услуги повторно функционираат непречено, откако беа решени проблемите предизвикани од глобален прекин во работата.
Според соопштението, проблемите се отстранети, а Outlook, Teams и Copilot се повторно достапни за корисниците, пренесе BBC.
Прекинот зафати повеќе од 70 земји. Компанијата наведе дека околу 430 милиони луѓе ширум светот се соочиле со технички потешкотии – кои настанале за време на надградба на капацитетот на мрежата, а не како резултат на сајбер-напад или дејствување на агент за вештачка интелигенција.
Во четвртокот, корисниците почнаа да пријавуваат тешкотии при пристапот до алатките во рамките на пакетот Microsoft 365; услугите беа целосно вратени 24 часа откако се појавија проблемите.
Во Обединетото Кралство, погодени беа делови од Националната здравствена служба (NHS), како и некои училишта и полициски служби.
Во Канада, националната железничка мрежа ги предупреди патниците дека можеби нема да добиваат известувања преку е-пошта за своите патувања, додека болниците низ целата земја, исто така, се соочија со проблеми во системите за е-пошта.
Во Соединетите Држави, вработените во Претставничкиот дом изјавија за медиумот „Politico“ дека не можеле да работат бидејќи сите нивни податоци биле зачувани во Outlook.
Владата на Сингапур потврди дека некои од нејзините системи биле погодени, додека во Индија, прекинот во петокот ја попречи работата на многумина. Во Турција, советници и официјални лица кои присуствуваа на самитот за климата COP31 во Анталија не можеа да ги спроведат планираните активности поради неможноста за пристап до услугите. Проблемите, исто така, влијаеја врз помалите бизниси и бројни поединци.
