Шокантен пресврт: Откриена е земјата што стои зад нападите врз паметните фрижидери – тоа не се Русите

Франција најавува санкции откако хакери наводно презеле контрола врз системите на Danfoss и уништиле залихи на храна.

Франција ја обвини Иранската револуционерна гарда за извршување сајбер-напади врз супермаркети, при што биле онеспособени системите за ладење на храната. Како резултат на тоа, фрижидерите и замрзнувачите почнале да се загреваат, што довело до уништување на тони месо, зеленчук и други прехранбени производи, пренесува Би-Би-Си.

Францускиот министер за надворешни работи, Жан-Ноел Баро, ги опиша нападите како невидени според обемот и сериозноста и најави санкции против одговорните. Поради тоа, Франција го повика иранскиот амбасадор и упати остар протест.

Според француските истражители, нападите можеби ги извршила хакерска група позната како Shahid Kaveh, која е поврзана со Иранската револуционерна гарда. Истрагата е насочена кон водачот на групата и неговите двајца заменици.

Првиот напад се случил на 11 октомври, кога хакери презеле контрола врз софтвер од данската компанија Danfoss – софтвер што им овозможува на продавниците далечински да управуваат со своите фрижидери и замрзнувачи. Биле погодени повеќе од 100 продавници од ланецот Coopérative U, како и 180 продавници под брендовите Intermarché и Netto. На мета се нашле и Carrefour, Monoprix и E. Leclerc. Во некои продавници, температурите во фрижидерите преку ноќ наводно се искачиле дури до 50 степени Целзиусови.

Проблеми низ Европа
Нов бран напади следел на почетокот на ноември, при што биле погодени повеќе од 100 продавници во неколку европски земји. Проблеми се пријавени во Белгија и Луксембург, како и во Шведска, Ирска, Холандија, Естонија и Финска. Сè уште не е познато дали сите напади се поврзани.

Иран сè уште официјално нема одговорено на обвинувањата, иако некои ирански медиуми ги отфрлија како неосновани. Француските власти не открија врз основа на што заклучиле дека зад нападите стои Техеран. Идентификувањето на одговорните за вакви напади често е тешко, бидејќи хакерите можат да ги прикријат своите траги.

Одговорноста за нападите ја презедоа и две хакерски групи поврзани со Русија, но експертите се скептични во однос на овие тврдења.

Во меѓувреме, се истражуваат и слични инциденти во неколку воени бази во САД. Во август, фрижидерите на овие локации одеднаш престанаа да работат, поради што храната се расипа. Истражителите не ја исклучуваат можноста дека и ова претставувало чин на намерна сајбер-саботажа.