Xiaomi 18: Нарачките се отворени, спецификациите се откриени
По претставувањето на Xiaomi 18 Pro и Pro Max во септември, вниманието се насочи кон стандардниот модел. Некои трговци во Кина веќе примаат резервации, додека првичните спецификации почнаа да се појавуваат на интернет.
Според објави на кинеската социјална мрежа Weibo, одредени продавници им овозможуваат на купувачите да остават депозит, со што обезбедуваат приоритет при изборот на боја и купувањето откако уредот ќе се појави во продажба. Сепак, ова е иницијатива на самите трговци, а не официјална програма за преднарачка од страна на Xiaomi.
Лансирањето на кинескиот пазар се очекува во декември, додека датумот за глобалното претставување засега останува непознат, пренесува Gizmochina.
Врз основа на моменталните неофицијални информации, се очекува Xiaomi 18 да има рамен дисплеј од 6,4 инчи со 1,5K резолуција, кој користи M11 панел. За перформансите ќе се грижи процесорот Snapdragon 8 Elite Gen 6 на Qualcomm, изработен со 2-нанометарска технологија.
Деталите за системот на камери се особено интересни. Се очекува уредот да има систем со три камери, кој вклучува:
- Главна камера од 200 MP со сензор од 1/1,28 инчи.
- Ултраширокоаголна камера од 50 MP.
- Телефото камера од 200 MP со 3x оптички зум.
Според истите извори, телефонот би можел да има батерија со капацитет од дури 7.200 mAh, како и поддршка за брзо жично и безжично полнење со моќност до 100 W. Исто така, се споменува и оперативниот систем HyperOS 4, базиран на Android 17.
Најновите информации од познатиот инсајдер Digital Chat Station сугерираат дека најмоќната конфигурација би можела да вклучува 16 GB RAM и 1 TB внатрешна меморија.
Важно е да се напомене дека Xiaomi сè уште нема потврдено ниту една од овие спецификации. Неодамна се појави и 3C сертификат за уред со број на модел M261DB – кој се поврзува со Xiaomi 18 – а кој вклучува поддршка за полнење од 100 W.
