Џејмс Блант го одржа ветувањето и го смени името во „Рајан Ер“ по успехот на неговиот нов албум

Пејачот Џејмс Блант (52) објави дека започнал постапка за промена на своето име, откако неговиот нов албум се искачи на врвот на британските музички топ-листи. Иако им вети на фановите дека ќе се преименува во „Рајан Ер“ (Ryan Air), документот што го сподели на социјалните мрежи открива дека тој го избрал името „Рајан Бел Ер“ (Ryan Bel Air).
Пејачот објави фотографија од своето барање за промена на името. Тој откри дека постапката го чинела 53,05 фунти – што е приближно 60 евра. Сè уште не е познато дали барањето е официјално одобрено.
Блант претходно им вети на фановите дека ќе го промени своето име во „Рајан Ер“ – инспириран од ирската нискобуџетна авиокомпанија „Рајанер“ (Ryanair), доколку неговиот осми студиски албум, Airplane Mode, стигне до првото место на британските топ-листи. По потврдата во петокот дека албумот го постигнал овој успех, пејачот објави информација со која покажа дека има намера да го одржи своето ветување.
Airplane Mode е првиот албум на Блант што се искачил на врвот на британските топ-листи во последните 19 години. Последен пат тој го постигнал ова во 2007 година со албумот All the Lost Souls, додека неговиот албум од 2005 година, Back to Bedlam, помина десет недели на првото место.
Блант и претходно се шегувал на темата за промена на своето име. По анкетата меѓу фановите во 2024 година, тој најави дека ќе се преименува во „Бланти МекБлантфејс“ (Blunty McBluntface) доколку реизданието на Back to Bedlam по повод 20-годишнината стигне до првото место. Албумот на крајот се искачи највисоко до седмото место, па пејачот сепак си го задржа своето име.
Неговата сопруга, Софија Велсли (43) му честиташе за успехот. Таа сподели фотографија од нив двајцата и напиша: „Број еден. Многу се гордеам со тебе. Но, нема да го сменам презимето.“
Пејачот е роден како Џејмс Хилиер Блаунт; бидејќи презимето „Блаунт“ се изговара исто како „Блант“, тој го променил начинот на пишување за да и биде полесно на јавноста да го запамети.
