Хали Бери и Оливие Мартинез повторно на суд: Актерот бара зголемување на алиментацијата
Францускиот актер Оливие Мартинез (60) побара зголемување на износот за издршка што го добива од неговата поранешна сопруга, холивудската ѕвезда Хали Бери (60), за нивниот 13-годишен син Масео. Тој го поднесе ова ново барање откако судот одлучи дека привремениот договор за старателство, според кој момчето поголемиот дел од времето го поминува со својот татко, ќе остане на сила најмалку до 17 декември.
Според судските документи до кои дојде магазинот People, Бери моментално плаќа приближно 8.000 долари месечно за издршка на детето. Овој износ беше утврден во август 2023 година, кога нивниот развод беше официјално финализиран. Дополнително, актерката е обврзана да издвојува 4,3 отсто од секој годишен приход што надминува 2 милиони долари.
Мартинез сега тврди дека износот за издршка треба да се зголеми бидејќи околностите врз основа на кои првично бил одреден, значително се променети.
Конкретно, претходниот договор се засноваше на претпоставката дека двајцата родители ќе поминуваат приближно еднакво време со својот син. Сепак, францускиот актер тврди дека Бери сега поминува само околу 18 отсто од времето со момчето, додека Масео поголемиот дел од времето го поминува со него. Следствено, тој бара неговата поранешна сопруга да му достави на судот ажурирани податоци за нејзините приходи, за да може да се утврди нов, и според него, посоодветен, износ за издршка.
Овие нови финансиски барања се појавуваат во услови на сè понапнат правен конфликт меѓу поранешните сопружници. Да потсетиме, Хали Бери неодамна претрпе значаен неуспех во борбата за старателство над својот син, откако судот одлучи дека 13-годишниот Масео поголемиот дел од времето ќе го поминува живеејќи со својот татко.
Според оваа одлука, на момчето моментално не му е дозволено дури ни да преноќи во домот на мајка му. Судот, исто така, ја укина претходно издадената забрана за приближување кон Мартинез, која беше поврзана со обвинувања за семејно насилство.
Конфликтот дополнително ескалираше откако Мартинез изнесе сериозни обвинувања против својата поранешна сопруга, тврдејќи дека таа го давела нивниот син за време на еден инцидент. Бери категорично ги негираше овие обвинувања. Сериозноста на спорот е нагласена со одлуката на судот да го сослуша самиот Месио. Момчето даде исказ на рочиште зад затворени врати, без присуство на неговите родители – ним им беше наредено да ја напуштат судницата.
