Холандија следната година нема да учествува на Евровизија

Холандија нема да учествува на Изборот за песна на Евровизија во 2027 година. Холандскиот јавен сервис, NPO, одлучи да го повлече своето учество откако одредени радиодифузери и вработени изразија противење. Од NPO наведоа дека во моментов нема доволно поддршка за враќање на натпреварот.

Џет де Раниц, претседателка на Управниот одбор на NPO, објасни дека биле водени разговори со радиодифузерите, но не било пронајдено решение што би ги задоволило сите. Иако првично се чинеше дека постои поддршка за учество, на крајот се покажа дека тоа не е така.

„Поради ова, заклучивме дека сè уште е прерано за враќање на Евровизија во 2027 година. Со оглед на чувствителноста на темите за кои се разговара, сметаме дека е најдобро засега да се воздржиме од учество“, изјави Де Раниц, како што пренесува холандскиот медиум RTL.

Одлуката дојде како изненадување, бидејќи кон крајот на септември NPO најави дека Холандија ќе се врати на Евровизија по едногодишна пауза. До промената дојде откако радиодифузерот AVROTROS – кој со години беше одговорен за учеството на Холандија на Евровизија – кон крајот на август ја префрли организацијата на NPO (Холандски јавен сервис).

AVROTROS се противеше на враќањето на натпреварот, првенствено поради учеството на Израел и војната во Газа. И покрај овие приговори, NPO првично одлучи да ја пријави Холандија, верувајќи дека Евровизија може да послужи како можност за поврзување на луѓето преку музиката.

Сепак, по дополнителни разговори со радиодифузерите, таа одлука беше променета.

Програмскиот директор на NPO, Јуре Босман, изјави дека разбира зошто учеството на Израел предизвикува дебати и поделби. „Сакаме да испратиме изведувачи и нивните тимови на Евровизија само доколку тие имаат цврста поддршка од барем еден радиодифузер. Само на тој начин тие можат достојно да ги претстават вредностите на музиката, културата, различноста и заедништвото“, рече тој.

Тој нагласи дека одговорноста за учеството не може да падне само на изведувачите. „Мораме заедно да ја преземеме оваа одговорност. Затоа, по разговорите со Советот на радиодифузери, одлучивме дека Холандија нема да учествува на Евровизија во 2027 година“, додаде тој.

Иако нема да испрати свој претставник, Холандија ќе продолжи да го емитува натпреварот за песна на Евровизија. Како и во минатото, за телевизискиот пренос ќе биде задолжен NOS.