Русија би можела да обезбеди важни улоги во ОН: војната во Украина веќе не претставува пречка

Русија се обидува да обезбеди високи позиции на денешниот состанок на агенцијата за телекомуникации при ОН, што дипломатите го толкуваат како обид на Москва да ја намали меѓународната изолација предизвикана од војната во Украина и да стекне поголема контрола врз дигиталните технологии, пишува Ројтерс.
Дипломати во Обединетите нации наведуваат дека кај одредени земји расте отпорот кон јавното спротивставување на Русија. Тие сметаат дека Москва го користи сè поизразениот „воен замор“ за да обезбеди позиции што би можеле да го зајакнат нејзиното влијание во рамките на системот на ОН. Како што продолжува конфликтот, некои земји ги обновуваат трговските и безбедносните врски со Москва, поради што не сакаат отворено да ѝ се спротивстават во ОН, изјави еден дипломат. Ова ги зголемува шансите на Москва во споредба со претходните години.
Минатата година Русија не успеа да влезе во одборот на Светската здравствена организација, а во 2023 година не доби доволно гласови за враќање во Советот за човекови права – главното тело на ОН во оваа област. Москва сега се надева дека ќе обезбеди две важни улоги на состанокот на Меѓународната унија за телекомуникации (ITU) во Доха. За десетици позиции одлучуваат 194-те земји-членки на ITU.
„Доколку бидат избрани, тоа би покажало дека Русија се вратила во мултилатералниот систем. ОН се уморни од прашањето за Украина“, изјави западен дипломат кој сакаше да остане анонимен. Руската дипломатска мисија при ОН во Женева одби да ја коментира ситуацијата.
Јевгениј Цимбалјук, амбасадорот на Украина при ОН во Женева, изјави дека руските напади предизвикале штета од над 2,5 милијарди долари на украинската телекомуникациска мрежа – бројка што не ги вклучува сајбер-нападите. „Ваквото однесување не треба да се наградува“, рече тој.
Меѓународната унија за телекомуникации е една од најстарите агенции на ОН. Основана во 1865 година за координирање на телеграфските услуги, таа денес е одговорна за распределба на глобалниот радио-спектар и помага во дефинирањето на стандарди за вештачката интелигенција и новите технологии.


