Ким Џонг-ун доби овластување да командува со нуклеарните сили, ја повика војската да се подготвува за војна
Севернокорејскиот лидер Ким Џонг-ун доби дополнителни уставни овластувања, меѓу кои и директно командување со нуклеарните сили, а воените команданти ги повика да ги засилат подготовките за можен воен конфликт. Промените доаѓаат во период на зголемени тензии со Јужна Кореја, чие обединување со Северна Кореја Пјонгјанг и официјално го отфрли.
Северна Кореја неодамна повторно го објави текстот на својот устав, речиси три години откако го отстрани од официјалната интернет-страница. Станува збор за документ изменет во март годинава, со кој дополнително се зацврстува власта на Ким.
Ким доби поголема контрола врз државата и војската
Со измените, севернокорејскиот лидер добива право на вето врз одлуките на парламентот, како и можност да разрешува пратеници кои ќе ја загубат довербата на народот.
Како претседател на Комисијата за државни работи, Ким добил и изречно овластување да командува со нуклеарните сили, како и можност да го пренесе правото за употреба на нуклеарно оружје на надлежно воено тело.
Со тоа дополнително се зацврстува неговата позиција на чело на земјата, која технички сè уште е во војна со Јужна Кореја. Корејската војна заврши во 1953 година со примирје, но мировен договор никогаш не беше потпишан.
Пјонгјанг се откажа од обединувањето на двете Кореи
Во изменетиот устав повеќе нема одредби за обединување на двете Кореи, а Јужна Кореја е дефинирана како посебна држава. Со тоа е потврдена промената во политиката на Пјонгјанг, која Ким ја најави уште кон крајот на 2023 година.
„Промената на севернокорејскиот устав го одразува она што го знаеме веќе три години – Северна Кореја не сака да има никаква врска со Јужна Кореја“, изјави за „Њузвик“ Едвард Хауел, автор на книгата „Новата оска на превирања: Северна Кореја, Русија, Кина, Иран“.
Јужнокорејскиот претседател Ли Џе-мјунг повика на воспоставување траен мир, но Пјонгјанг ги отфрла обидите за приближување меѓу двете држави.
Ким претходно изјави дека Северна Кореја нема апсолутно никаква работа со својот јужен сосед. Според Хауел, со тоа Пјонгјанг испраќа јасна порака дека не е заинтересиран за напорите на јужнокорејската влада за обновување на односите.
Ким ја повика војската да се подготвува за војна
Тензиите дополнително се зголемија во последните недели поради севернокорејските воени активности. Според извештаите, Пјонгјанг тестирал балистички ракети, а на почетокот на месецот биле забележани и тенкови во близина на границата со Јужна Кореја.
Сестрата на Ким, исто така, се закани со немилосрдно уништување, додека севернокорејскиот лидер ги повика воените команданти да ја зголемат борбената готовност на своите единици.
„Главната револуционерна задача на командантите на чети е да ги довршат борбените подготовки на своите единици за да бидат целосно подготвени за војна. Тоа мора да се постигне со значително интензивирање на воената обука“, порача Ким.
Тој додаде дека неговата крајна цел е изградба на најсилна можна армија и забрзување на нејзината модернизација. Уставните измени дополнително ја зацврстуваат неговата контрола врз вооружените сили, вклучително и врз нуклеарниот арсенал.
